قصائد جميله للشار جمعه الحلفي اقرئها بعنايه وتابع الكلمات الجميله
بساتين الورد
من يا نبع مرتوي؟
من يا غصن تفاح جْبتْ ألوان لخدودك
من يامجره نزلت
من ياسما ويا گَاع لميت الْهوُه لْعودك
وك أنا مجبور..
أنا مجبور بعيونك
خليني لْبساتين الورد ناطور
مَحّدْ يوصل حدودك.
ــــــــــــــــــــــــــــــــــــــــــــــــــــــــــــــــــــــــــــ
غصن التين
يا مايْ ليوصلنّي لْبساتينك؟
يا نسمة؟
يا نهر الْيدلّيني يغصن تينك؟
وك تِعَبْتْ وتعبتني وياك
وديت العمر.. كل العمر خطار
بلچن ترحم سنينك
تداويني؟
شتداويني وانا مبضّع على طولي بسچاچينك
حسافة على الزمان الفات وياك
وحسافة عليك، فرّطت العشگ ع الرايح وع الجاي
بس وياي ما عدلت ميازينك
روح بلا عتب ما تسوه حتى عتاب
إلي ديني وألك دينك
ـــــــــــــــــــــــــــــــــــــــــــــــــــــــــــــــــــــ
نوم الحمام
مثل نوم الحمام ينام
يسكر بأول الكاسات
ويتثاوب غنج من أول الگرصات
وآنه...
آنه اصبر صبر هايم
ياشباچ روحي..
يا هواها وليلها وقنديلهه الدايم
چانه شظل إلي من النوم
وانتَه النوم كله وياك نايم؟
ــــــــــــــــــــــــــــــــــــــــــــــــــــــــــ
برد
چنت أدورلك بروحي على گمره
تفيي لسنينك وتنثرلك سعد
چنت أدورلك على غيمه زغيره
تطش على أيامك ورد
چنت اسامح واشتكيلك
يلي غارگ بالدفو
وك روحي مليانه برد!
ـــــــــــــــــــــــــــــــــــــــــــــــــــــ
نوم الظهاري
ماجو على موعدي
گالوا خذانه النوم
وآنه من مية سنة
أنطر لذاك اليوم
خلصّت كاس الهنا
وصبيت كاس هموم
يا نوم شلّك علي..
اللي يريدك تهجره
والمايريدك زايره كل يوم!
ـــــــــــــــــــــــــــــــــــــــــــــــ
أمير الحمام
مرات يچذب علي
بعيونه يبان الچذب
من يستحي تحمر خدوده خجل
ومن يبتسم بالروح... يلعب لعب
وآنه أظل متلّوه بحيرتي
الله البلاني بيه
چا ياهو اليفك بلوتي؟
ـــــــــــــــــــــــــــــــــــــــــــــــ
خميلة عيد
سبحان الفرح بشفافك ألوان
من تضحك تصير الدنيا بستان
وسبحان النسيم اللي يمر بيك
يسلّم ع الرّمش والرّمش نعسان
وسبحان الحلاوة التحت العيون
وسبحان الضوه الخجلان والغيران
سبحانك خميلة عيد ومراجيح
وسبحان الثمر ع الصدر ريان
سبحانك يحلو الطول يمگمّر
سبحانك... وألف... سبحان
ـــــــــــــــــــــــــــــــــــــــــــــــــــــ
وين أنته؟
أدور عليك
ما خليت جوري ما نشدته عليك
أدور عليك..
من أول صبا لليوم
رحتلك للشتا وللصيف
ورحتلك للصحو وللطيف
أدور عليك بين الياس والريحان
أدور عليك بين المشمش الريان
أدور عليك بين التين والقداح
ساءلت البريسم والطلع والخوخ والرمان
وحلفّت الهوه والنوم والتفاح
وناشدت الغطا النعسان
أدور عليك.. وين أنته؟
آنه من التعب تعبان!
ـــــــــــــــــــــــــــــــــــــــــــــــــــــــــ
آخر كاس
چذّبت روحي وصدگتك أنته
من گلتلي: يمكن تخضّر بگايا الروح ياس
وعلى هالچذبه...
شربت وياك آخر كاس!
مدري!
ناطرتك..
مثل ما تنطّر الورده نداها
وانته موگطرة نده وبس
أنته نهر الروح، تسگي الروح وتخفف ظماها
ناطرتك..
مثل ما تنطر الگاع المطر
روحي صبخه وانته غيمة شوگ
تتباهى بنسايمها وهواها
أنته من ياكون اجيت
يامجرّة مضيع سنيني بسماها
انته عفت الناس كلها وتلوهتني
منين اجيب سنين لشواگك،
وانا عمري تعداها وجزاها
انته... جمرة شوگ بيدي
مدري اذبها.. مدري اچوي سنيني بيها
مدري اخلي العمر يتباهى بضواها
يانبي موديك گلي؟
تگطع صيامي وانا الحالف قسم،
مابدّل الجنة بسواها
ضوگتني...
ضوگتني طعم البساتين من تفاحة آدم
وانته تفاح البساتين وغواها
من طراوة طولك تطول الأيام
ومن حلاوة عشرتك يگصر مداها
انته من تهل طواري العيد هلت،
يا فرحها ويا طربها ويا غناها
انته شجرة ياسمين،
اشجاله شمام البراري يغار من نسمة هواها؟
انته...
انته يا مجنون دلاك عله دربي؟
يا نبي مسودن رسملك سجتي؟
يانهر جابك على العشبه وسگاها،
وك روحي صبارة حزن يبن الأوادم
وانته گطرة فرح..
شيساگي العمر لو عطشت سنينه لصباها
بس اگلك:
انته مو گطرة فرح،
انته كل الفرح
كل الحزن
كل الورد
كل نجوم عمري وكل سماها.
ـــــــــــــــــــــــــــــــــــــــــــــــــــــــ
مرجان
سبگني لحسنك الرمان... وتفرّط...
مثل حبات ليلو عله النهد
والگاع ما وسعت غنج...
مرجان يتغاوى بوسط مرجان
حبه هنا... وحبه هناك
بوسات ونوايح والروايح للسما
حنه وسعد مديوف هالنعسان
ساكت... وانا حاير
والغطا منده..
وشته مصيف گبل نيسان
آنه ما شايف شته بنصّ الشته وعرگان؟
معذور العمر لو ذاب...
لو ضاع بحلاة النوم والنسيان
ماهوه العمر... كل العمر... بمُية الفنجان غرگان!
ساكت وآنه حاير.. ليش زعلان النهد؟..
والروح تصرخ... ليش عالي الشان زعلان؟
داويني...
داويني يصاحب جمبده وساهون فوگ الصرّه
وطيورك زغيره ترف بلا جنحان
داويني...
داويني العشگ هدني
وحلاتك ساحنه الروح
وطراوة شفتك ما ترحم التلفان
وك داويني يدافي من الثلج ومحير النهران
داويني...
أصيح من الجمر والجمر گبلي يصيح بردان!
ـــــــــــــــــــــــــــــــــــــــــــــــــــــــــــــــــــ
حاير
حاير...
دايره الدنيا
وانه ويَّ الدنيا داير
مبحر.. ومدري لوين يريد بيه الموج
دوختني الدواير..
شايل شراعي مثل راية حزن
مركب بنص بحر ضايع
شايل شراعي وشواطيك بعيده
ولاني رايح لاني راجع
ضيعتني.. وضاعت سنيني غُلب
ولانه گادر اشتريك ولانه بايع!
ذابله أيامي مثل نخله وحيده على الشرايع
واگف بآخر سنين العمر
ناطر لاچن ماني ناطر
ليلي طال وحزني يتناسل حزن
أبچي... تنزل دموعي خناجر
ومن كثر حزني غدت روحي مگابر
ــــــــــــــــــــــــــــــــــــــــــــــــــــــــــ
مليت
راوست الثگل مرات
وعدلت الثگل مرات
داريت الحزن مرات
وخاويت الجرح مرات
باريت الزعل مرات
وجاريت الچذب مرات
وساهرت الليالي البيض وتعديت
وعديت الليالي السود وتعديت
لچن مليت...مليت
عاونتك على الكلفات مرات
وضگت كاسات من فرگاك مرات
وعفت لجلك هلي مرات.. مرات
وشفت منك مصايب ماسدن يا... طيب الذات
وعلى دربك رحت للموت ومن الموت رديت
ولجل عينك أنذال الناس باريت
لچن مليت... مليت
من ثگل الدمع بالعين.. مليت
ومن ثگل الحزن بالروح.. مليت
ومن ثگل الذنب بالراس.. مليت
أيام عديت الك
وسنين عديت الك
وزلات عديت الك
وحطيتك ابروحي
يمزيد جروحي
يا... شمعة البيت
مليت... مليت
وديني لهلي ياطيف
وصلني لهلي ياطيف
گربني لهلي ياطيف
هلي...
ياهلي... ياضيفي العزيزالماوراه ضيف
يا نسمه عليله بأول الصيف
يا ليلي الحزين الفارگ الكيف
يا لحظة حياة بطارف السيف
هلي..
ياهلي.. هلُو يالبعيدين
يا ناسينّا
وچنكم ولا ناسين
يمتانينّا ولا چنكم متانين
ياطعم العشگ ياريحة الطين
يا نفحة وطن محروگ يا بيت
أنا مليت...
مليت..
مليت..
مليت
